МАТТО го пречека Проданоски: „Сакаме да ги видиме турските брендови во Прилеп“
Matto2026-02-18T12:09:05+00:00Градоначалникот на Општина Прилеп, Дејан Проданоски, оствари средба со членките на МАТТО, упатувајќи повик до турските компании да ги разгледаат инвестициските можности во Прилеп.
Средбата се одржа во просториите на МАТТО, во присуство на Претседателот на МАТТО, Ајдован Адемоски, каде што турските бизнисмени имаа можност директно да разговараат со градоначалникот Проданоски. Во своето обраќање, Адемоски изрази благодарност за посетата и ја истакна важноста на економската соработка и турските инвестиции.
Проданоски посочи дека посетата на МАТТО следува по посетата и поканата од Амбасадорот на Република Турција во Скопје, Фатих Улусој, при неговата посета на Општина Прилеп. Тој нагласи дека општината нуди значајни инвестициски можности во повеќе сектори.
До 2028 година – значително подобрување на инфраструктурата
Како експерт од областа на патната инфраструктура, Проданоски информираше дека во координација со Владата се работи интензивно на реализација на автопатот Прилеп–Битола, како и на други поврзувачки патишта, кои се очекува да бидат завршени во наредните четири години. Тој потенцираше дека инвестициите бараат време и детална анализа, но дека моментот е поволен за започнување на подготовките.
Силен потенцијал во природните ресурси и индустријата
Градоначалникот истакна дека прилепскиот бел мермер е користен во значајни објекти ширум светот, од Белата куќа до палати во Абу Даби, што говори за квалитетот и потенцијалот на природните ресурси во регионот.
Прилеп е препознатлив и по производството на тутун, со автентичен вид тутун кој има висока пазарна вредност. Покрај тоа, постојат сериозни можности за развој во земјоделството, индустријата и преработувачкиот сектор.
Проданоски нагласи дека градот има потенцијал и за станбени проекти, како и потреба од модерен затворен трговски центар. Воедно, потсети дека во Прилеп веќе функционираат големи компании како Витаминка, со повеќедецениска традиција, како и можности за инвестиции во одбранбената индустрија.
„Ги очекуваме турските брендови и турските студенти“
Проданоски истакна дека во градот се чувствува недостаток на турски брендови, посочувајќи дека граѓаните на Прилеп често патуваат во Битола за да посетат продавници како LC Waikiki.
Тој додаде дека Прилеп располага со квалитетни факултетски програми и изрази желба турските студенти да изберат да студираат токму во Прилеп.
Во однос на туризмот, градоначалникот нагласи дека регионот има значителен потенцијал, со богата фестивалска и културна програма, но дека постои потреба од унапредување на сместувачките капацитети, особено во хотелскиот сектор.
Средбата заврши со заедничка подготвеност за продлабочување на соработката и отворање нови можности за турските инвеститори во Прилеп.




